ଭୁବନେଶ୍ୱର : ଓଡିଶାରେ ଅବସ୍ଥାପିତ ଏକ ଟେକ୍ ଷ୍ଟାର୍ଟଅପ୍ ବନ ଭି ଏରୋ ପକ୍ଷରୁ ସି.ଭି. ରମଣ ଗ୍ଲୋବାଲ ୟୁନିଭର୍ସିଟି କ୍ୟାମ୍ପସରେ ଆୟୋଜିତ ଏକ କାର୍ଯ୍ୟକ୍ରମରେ ଭାରତର ପ୍ରଥମ ଫୁଲି ଅଟୋନୋମସ ଲଜିଷ୍ଟିକ୍ସ ଡ୍ରୋନ୍ ଏୟାର ଓର୍କାର ଔପଚାରିକ ଶୁଭାରମ୍ଭ କରାଯାଇଛି । ଟେସଲା ଏବଂ ହଟମେଲ୍ ଭଳି କମ୍ପାନୀରେ ନିଜର ପ୍ରାରମ୍ଭିକ ପୁଞ୍ଜିନିବେଶ ପାଇଁ ଜଣାଶୁଣା ପ୍ରଖ୍ୟାତ ଉଦ୍ୟୋଗପତି ଟିମ୍ ଡ୍ରେପରଙ୍କ ସମେତ ଇନଫ୍ଲାକ୍ସନ ପଏଂଟ ଭେଂଚର୍ସ, ହେଡଷ୍ଟାର୍ଟ, ବିୟୋଣ୍ଡ ଭେଂଚର୍ସ, ଇଣ୍ଡସ ବ୍ରିଜ୍ ଭେଂଚର୍ସ, ଆଇଆଇଟି ମଣ୍ଡି କ୍ୟାଟାଲିଷ୍ଟ, ଶ୍ରୀ ଶ୍ରୀ ବିଶ୍ୱବିଦ୍ୟାଳୟ ଏବଂ ଅନ୍ୟାନ୍ୟ ଶିଳ୍ପ ଭେଟେରାନମାନଙ୍କ ଉପସ୍ଥିତି ଦ୍ୱାରା ଭାରତର ଡ୍ରୋନ୍ ଏବଂ ଲଜିଷ୍ଟିକ୍ ଟେକ୍ନୋଲୋଜିରେ ଏହି ମାଇଲଖୁଂଟର ଗୁରୁତ୍ୱ ଆହୁରି ବୃଦ୍ଧି ପାଇଛି ।ଡ୍ରେପର୍ଙ୍କ ସମର୍ଥନ ବନ୍ ଭି ଏରୋରେ ଆନ୍ତର୍ଜାତୀୟ ଆଗ୍ରହକୁ ଆଲୋକପାତ କରିଛି, ଯାହା ଓଡିଶାକୁ ଅତ୍ୟାଧୁନିକ ବୈଷୟିକ ଉଦ୍ଭାବନ ପାଇଁ ଏକ ଉଦୀୟମାନ କେନ୍ଦ୍ର ଭାବେ ଅବସ୍ଥାପିତ କରିଛି ।
ଏସମ୍ପର୍କରେ ବନ୍ ଭି ଏରୋର ସିଇଓ ସତ୍ୟବ୍ରତ ଶତପଥୀ କହିଛନ୍ତି, “ଏୟାର ଓର୍କାର ଆଜିର ଶୁଭାରମ୍ଭ ଭାରତର ପରିବହନ କ୍ଷେତ୍ର ପାଇଁ ଏବଂ ଓଡିଶା-ଭିତିକ କମ୍ପାନୀ ଭାବେ ଆମ ପାଇଁ ଏକ ଗୁରୁତ୍ୱପୂର୍ଣ୍ଣ ଅଗ୍ରଗତିକୁ ଚିହ୍ନିତ କରିଛି । ଏହି ଡ୍ରୋନକୁ ସ୍ୱଦେଶୀ ଭାବେ ବିକାଶ ଓ ନିର୍ମାଣ କରିବା, ଆମକୁ ଭାରତର ସ୍ୱତନ୍ତ୍ର ଆବଶ୍ୟକତା ପାଇଁ ନିର୍ମାଣ କରିବା ଲାଗି ଅନୁମତି ଦେଇଛି । ଟିମ୍ ଡ୍ରେପର୍ଙ୍କ ସହଯୋଗ ଏହି ଶୁଭାରମ୍ଭର ପ୍ରଭାବକୁ ଆହୁରି ମଜବୁତ କରିଛି ଏବଂ ଆମେ ତାଙ୍କର ସମ୍ପୃକ୍ତି ପାଇଁ କୃତଜ୍ଞ ଅଟୁ କାରଣ ଆମେ ଏୟାର ଓର୍କାର ଲାଭକୁ ଭାରତରେ ଉଭୟ ବେସାମରିକ ଓ ପ୍ରତିରକ୍ଷା ପ୍ରୟୋଗଗୁଡିକ ପାଇଁ ବୃଦ୍ଧି କରିବାକୁ ଲକ୍ଷ୍ୟ ରଖିଛୁ ।” ଟିମ୍ ଡ୍ରେପର୍ ଏହି କାର୍ଯ୍ୟକ୍ରମରେ ନିଜର ଉତ୍ସାହ ବ୍ୟକ୍ତ କରି କହିଛନ୍ତି, “ଓଡିଶାରେ ଏୟାର ଓର୍କାର ଶୁଭାରମ୍ଭର ସାକ୍ଷୀ ହେବା ଉତ୍ସାହଜନକ ଅଟେ । ଏୟାର ଓର୍କା ଭଳି ଅଟୋନୋମସ ଡ୍ରୋନଗୁଡିକ ବିପର୍ଯ୍ୟୟ ମୁକାବିଲାଠାରୁ ଆରମ୍ଭ କରି ଅତ୍ୟଧିକ ଉଚ୍ଚ ସ୍ଥାନରେ ପରିଚାଳନା ପର୍ଯ୍ୟନ୍ତ ଅସଂଖ୍ୟ ବ୍ୟବହାର ମାମଲା କ୍ଷେତ୍ରରେ ପହଂଚ, ନମନୀୟତା ଓ ନିର୍ଭରଯୋଗ୍ୟତା ବିସ୍ତାର କରି ଆଧୁନିକ ପରିବହନ ପାଇଁ ବ୍ୟବହାରିକ ସମାଧାନ ପ୍ରଦାନ କରୁଛି ।ମୁଁ ଅନୁମାନ କରୁଛି ଯେ ବୋନ ଭି ଏରୋର ଉଦ୍ଭାବନ ଭାରତ ଏବଂ ବିଶ୍ୱସ୍ତରରେ ବିପର୍ଯ୍ୟୟ ମୁକାବିଲା ପାଇଁ ଏକ ପ୍ରଭାବଶାଳୀ ଉପକରଣ ହୋଇପାରିବ ।”
ଏୟାର ଓର୍କା ଡ୍ରୋନ୍କୁ ବନ୍ ଭି ଏରୋ ଦ୍ୱାରା ସମ୍ପୂର୍ଣ୍ଣ ରୂପେ ଭାରତରେ ପରିକଳ୍ପନା, ବିକାଶ ଓ ନିର୍ମାଣ କରାଯାଇଛି । ଆଡ୍ଭାନ୍ସଡ ଅଟୋନୋମସ କ୍ଷମତା ସହିତ ଏୟାର ଓର୍କାକୁ ବିଭିନ୍ନ ପ୍ରକାରର ପରିବହନ ସମସ୍ୟାଗୁଡିକର ସମାଧାନ କରିବା ପାଇଁ ନିର୍ମାଣ କରାଯାଇଛି, ବିଶେଷ କରି ଉକ୍ତ ଅଂଚଳଗୁଡିକରେ ଯେଉଁଠାରେ ପାରମ୍ପରିକ ପରିବହନ ପଦ୍ଧତି ଅସାଧ୍ୟ ଅଟେ । ଏହି ଡ୍ରୋନକୁ ବିପର୍ଯ୍ୟୟ ପରବର୍ତୀ ସ୍ଥିତିରେ ଏକ ପ୍ରଥମ ପ୍ରତିକ୍ରିୟାଶୀଳ ମାଧ୍ୟମ ରୂପେ କାର୍ଯ୍ୟ କରିବା, ପ୍ରଭାବିତ ଅଂଚଳଗୁଡିକରେ ରିଲିଫ୍ ସାମଗ୍ରୀ ପହଂଚାଇବା ଏବଂ ଜରୁରୀକାଳିନ ସ୍ଥିତିରେ ଗୁରୁତ୍ୱପୂର୍ଣ୍ଣ ସହଯୋଗ ପ୍ରଦାନ କରିବା ପାଇଁ ଡିଜାଇନ କରାଯାଇଛି । ଏହାର ହାଇ-ଅଲ୍ଟିଚ୍ୟୁଡ କ୍ଷମତାଗୁଡିକ ଏହାକୁ ହିମାଳୟ ସମେତ ଆହ୍ୱାନପୂର୍ଣ୍ଣ ଭୂଭାଗରେ ପ୍ରାୟ ୨୦,୦୦୦ ଫୁଟ୍ ଉଚ୍ଚତାରେ ସେନାର ଲଜିଷ୍ଟିକ୍ସ ଅପରେଶନ ପାଇଁ ଉପଯୁକ୍ତ କରୁଛି । ବୋନ ଭି ଏରୋ ହେଉଛି ପ୍ରଥମ ଭାରତୀୟ କମ୍ପାନୀ ଯିଏ ୧୯,୦୨୪ ଫୁଟ ଉଚ୍ଚତାରେ ସବୁଠାରୁ ଉଚ୍ଚତମ ମୋଟରେବଲ ରୋଡ଼ ପାସ, ଲଦାଖର ଉମଲିଙ୍ଗ ଲା ଠାରେ ୩୦ କିଲୋଗ୍ରାମର ପେଲୋଡ୍ ଉଠାଇ ବିଶ୍ୱ ରେକର୍ଡ ସ୍ଥାପନ କରିଛି ।ଏତେ ଉଚ୍ଚତାରେ ସମାନ ମାଲ ପରିବହନ ବେଳେ ଅଧିକ ଚ୍ୟାଲେଞ୍ଜର ସମ୍ମୁଖୀନ ହେଉଥିବା ହେଲିକପ୍ଟରକୁ ଏହି ପ୍ରଦର୍ଶନ ପଛରେ ପକାଇଦେଇଛି ।
ଏୟାର ଓର୍କା ସହିତ ବନ୍ ଭି ଏରୋ ବିଶ୍ୱବ୍ୟାପୀ ସ୍ୱାସ୍ଥ୍ୟସେବା, ଇକମର୍ସ, ସେନାର ପରିବହନ ଓ ବିପର୍ଯ୍ୟୟ ପରିଚାଳନା ଭଳି ବିଭିନ୍ନ କ୍ଷେତ୍ରରେ ବିବିଧ ପରିବହନ ଆବଶ୍ୟକତାକୁ ପୂରଣ କରିବା ପାଇଁ ଲକ୍ଷ୍ୟ ରଖିଛି । ଏହି ଶୁଭାରମ୍ଭ ଭାରତର ଟେକ୍ନୋଲୋଜି ଇକୋସିଷ୍ଟମରେ ଓଡିଶା ଭିତିକ କମ୍ପାନୀଗୁଡିକର ବର୍ଦ୍ଧିତ ଭୂମିକାକୁ ରେଖାଙ୍କିତ କରୁଛି ଏବଂ ସ୍ଥାନୀୟ ଉଦ୍ଭାବନ କିଭଳି ଜାତୀୟ ଓ ଆନ୍ତର୍ଜାତୀୟ ସ୍ୱୀକୃତି ହାସଲ କରୁଛି ତାହାକୁ ପ୍ରଦର୍ଶିତ କରୁଛି । ୨୦୨୧ରେ ୭ ଜଣ ସଦସ୍ୟଙ୍କର ଏକ ଛୋଟ ଟିମ୍ ସହ ନିଜର ଯାତ୍ରା ଆରମ୍ଭ କରିଥିବା ବନଭି ଏରୋକୁ ଭୁବନେଶ୍ୱର ଉପକଣ୍ଠରେ ସିଭି ରମଣ ବିଶ୍ୱବିଦ୍ୟାଳୟ ଠାରେ କାର୍ଯ୍ୟକ୍ଷମ କରାଯାଇଥିଲା ।ଏହି ଷ୍ଟାର୍ଟଅପ୍ ୪୦ ଜଣ ସଦସ୍ୟଙ୍କ ଏକ ଟିମ୍କୁ ବିସ୍ତାର ହୋଇଛି ଏବଂ ବର୍ତମାନ ଏହା ସମାନ ବିଶ୍ୱବିଦ୍ୟାଳୟ ପରିସର ମଧ୍ୟରେ ଏକ ଉତ୍ସର୍ଗୀକୃତ ମାନୁଫ୍ୟାକ୍ଚରିଂ ୟୁନିଟ୍ର ପରିଚାଳନା କରୁଛି ।
