Odisha tourism : ବିଦେଶୀ ପର୍ଯ୍ୟଟକଙ୍କ ପସନ୍ଦରେ ବିଚିତ୍ରପୁର

ବାଲେଶ୍ୱର, ୧୯|୦୩  : Balasore Famous Tourist Place ବାଲେଶ୍ୱର  ଜିଲ୍ଲା ଭୋଗରାଇ ବ୍ଲକର ମନଲୋଭା ପର୍ଯ୍ୟଟନ ସ୍ଥଳୀ ‘ବିଚିତ୍ରପୁର’ । ଅନନ୍ୟ ସୌନ୍ଦର୍ଯ୍ୟ ସହ ଜୈବ ବିବିଧତାକୁ ସତେ ଯେମିତି ନିଜର ବୁକୁରେ ଜାବୁଡ଼ି ଧରିଛି । ଝାଉଁ ଓ ହେନ୍ତାଳ ବନର ସାଇଁ ସାଇଁ ଶବ୍ଦ, ଦେଶୀ ବିଦେଶୀ ପକ୍ଷୀଙ୍କ କଳରବ ଏବଂ ଅଗଣିତ ନାଲି କଙ୍କଡ଼ାର ଲୁଚକାଳି ଖେଳ ଏହାକୁ ବେଶ୍ ଆକର୍ଷଣୀୟ କରୁଛି । ବଡ଼ କଥା ହେଉଛି, ଏଠାକାର ପ୍ରାକୃତ୍ତିକ ସୌନ୍ଦର୍ଯ୍ୟ ମଧ୍ୟରେ ରହିଥିବା ନୌ-ବିହାର ସୁବିଧା ବିଦେଶୀ ପର୍ଯ୍ୟଟକଙ୍କୁ ଅଧିକ ଆକର୍ଷିତ କରୁଛି । ଏହାକୁ ନେଇ ନମିତା ଗିରିଙ୍କ  ଏହି ସ୍ୱତନ୍ତ୍ର ଉପସ୍ଥାପନା ।

ବାଲେଶ୍ୱର ସଦର ମହକୁମାରୁ ୧୧୦ କିଲୋମିଟର ଦୂର ଏହି ବିଚିତ୍ରପୁର ଇକୋ ଟୁରିଜିମ୍କୁ ପ୍ରତ୍ୟେକ ଦିନ ରାଜ୍ୟ ସମେତ ସହସ୍ରାଧିକ ବଙ୍ଗୀୟ ଓ ବିଦେଶୀ ପର୍ଯ୍ୟଟକଙ୍କ ସୁଅ ଛୁଟୁଛି । ଓଡିଶା-ପଶ୍ଚିମବଙ୍ଗ ସୀମାନ୍ତରେ ଏହି ସ୍ଥାନ ରହିଥିବାରୁ ବିଶେଷ କରି ବଙ୍ଗୀୟ ପର୍ଯ୍ୟଟକଙ୍କ ଭିଡ଼ ଅଧିକ ଜମୁଛି । ତେବେ ନିଜର ସ୍ୱତନ୍ତ୍ରତା ପାଇଁ ଏହି ସ୍ଥଳ ବେଶ୍ ଆକର୍ଷଣୀୟ ହୋଇଛି । ଏଠାରେ ଝାଉଁ ଜଙ୍ଗଲ, ଧଳା ବନୀ, ବଡ଼ ବନୀ, ସିଙ୍ଗାଳ ବନୀ, ରାଇ, ସିନ୍ଧୁକା, ଗରଣୀ, ଖରସି, କେରୁଅଁ ଭଳି ନାନା ପ୍ରଜାତିର ଉଦ୍ଭିଦ ଓ ବନରାଜୀ ରହିଛି । ସେହିପରି ଡଲଫିନ୍, ନାଲି କଙ୍କଡ଼ା, ବିଦେଶୀ ପକ୍ଷୀ, ସରୀସୃପ ଏବଂ  ହାଏନା, ବିଲୁଆ, ଠେକୁଆ ଆଦି ବନ୍ୟପ୍ରାଣୀ ମଧ୍ୟ ଦେଖିବାକୁ ମିଳେ । ଏହାର ତିନି ପାଖରେ ବଙ୍ଗୋପସାଗର, ସୁବର୍ଣ୍ଣରେଖା ଓ ଏକ କେନାଲର ଜଳରାଶି ଘେରି ରହିଥିବାରୁ କେହି କେହି ଏହାକୁ ବିଚିତ୍ରପୁର ଦ୍ୱୀପ ବା ଟାପୁ ବୋଲି ମଧ୍ୟ କହନ୍ତି । ତେବେ ଏଠାକାର ପ୍ରାକୃତ୍ତିକ ସୌନ୍ଦର୍ଯ୍ୟ ତଥା ଏହି ସ୍ଥାନ ପ୍ରତି ଲୋକଙ୍କ ଆଗ୍ରହକୁ ଦେଖି ଓଡ଼ିଶା ସରକାରଙ୍କ ବନ ବିଭାଗ ଓ ସ୍ଥାନୀୟ କମିଟିର ମିଳିତ ପ୍ରୟାସରେ ଏହାକୁ ଅଧିକ ଲୋକାଭିମୁଖି କରାଯିବା ସହ ଏହାକୁ ଇକୋ ଟୋରିଜିମ୍ ଭାବେ ଘୋଷଣା ମଧ୍ୟ କରାଯାଇଛି । ଏଥିସହ ଯନ୍ତ୍ରଚାଳିତ ବୋଟ୍ ଓ ନୌ-ବିହାର ସୁବିଧା ମଧ୍ୟ କରାଯାଇଛି ।  ପର୍ଯ୍ୟଟକମାନେ ବନାନୀ ମଧ୍ୟରେ ଶାନ୍ତ ଜଳରାଶିରେ ଭ୍ରମଣ କରିବା ସହ ଜୀବଜନ୍ତୁଙ୍କୁ ଦେଖି ବେଶ୍ ଉଲ୍ଲାସିତ ଅନୁଭବ କରୁଛନ୍ତି । ଏଥିସହ ପର୍ଯ୍ୟଟକଙ୍କ ରହଣି ପାଇଁ ବନ ବିଭାଗ ପକ୍ଷରୁ ଏଠାରେ ଦେୟ ରହଣି ବ୍ୟବସ୍ଥା ବି କରାଯାଇଛି । ଏସବୁ ସୁବିଧା ଭିତରେ ବିଦେଶୀ ପର୍ଯ୍ୟଟକ ବେଶ୍ ମଜା ଉଠାଉଛନ୍ତି ।

ପ୍ରକାଶ ଥାଉକି, ପ୍ରାୟ ଏକ ଶହ ହେକ୍ଟରରୁ ଅଧିକ ହେନ୍ତାଳ, ତାଳ ଚୁଆ ତଥା ବହୁବିଧ ସାମୁଦ୍ରିକ  ଉଦ୍ଭିଦର ବନକୁ ନେଇ ଏହି ଇକୋ ଟୁରିଜିମ୍ ପ୍ରକଳ୍ପ କାର୍ଯ୍ୟକାରୀ କରାଯାଇଛି । ତେବେ ଗତ ୨୦୨୪-୨୫ ଆର୍ôଥକ ବର୍ଷରେ ୨୨ ଶହରୁ ଅଧିକ ପର୍ଯ୍ୟଟକ ଏଠାରେ ନୌ-ବିହାର କରିଥିବା ବେଳେ ସେଥିରୁ ୧୦ରୁ ଅଧିକ ବିଦେଶୀ ପର୍ଯ୍ୟଟକ ରହିଛନ୍ତି । ଏହି ସଂଖ୍ୟା ଆଗକୁ ବଢ଼ିବା ନେଇ ଅନୁମାନ କରାଯାଉଥିବା କମିଟିର ସଦସ୍ୟମାନେ ମତ ରଖିଛନ୍ତି ।

 

ROURKELA : ଇସ୍ପାତ ନଗରୀରେ ଆସ୍ଥାର ପୀଠ: ବେଦବ୍ୟାସ VEDAVYASH
ଆହୁରି ପଢନ୍ତୁ – https://prajuktiodisha.com/vedvyash-temple-rorkela/

Bichitrapur Eco Tourism , Odisha tourism ,Bichitrapur Eco Tourism ,Odisha tourism ,Nature destination