ଭୁବନେଶ୍ୱର: ବିଶ୍ୱ ମ୍ୟାଲେରିଆ ଦିବସ ଅବସରରେ ଓଡ଼ିଶାର ୧୦୮ ଆମ୍ବୁଲାନ୍ସ ସେବାର ଅପରେଟର ଇଏମ୍ଆରଆଇ ଗ୍ରୀନ୍ ହେଲ୍ଥ ସର୍ଭିସେସ୍ ପକ୍ଷରୁ ୩୦ଟି ଜିଲ୍ଲାରେ ରାଜ୍ୟବ୍ୟାପୀ ସଚେତନତା ଅଭିଯାନ କରାଯାଇଛି। ମ୍ୟାଲେରିଆ ନିରାକରଣ ଏବଂ ୧୦୮ ଜରୁରୀକାଳୀନ ଆମ୍ବୁଲାନ୍ସ ସେବାର ବ୍ୟବହାରକୁ ପ୍ରୋତ୍ସାହିତ କରିବା ପାଇଁ ଗ୍ରାମୀଣ ସମୁଦାୟଙ୍କୁ ସଚେତନ କରିବା ଏହି ପଦକ୍ଷେପର ଉଦ୍ଦେଶ୍ୟ ଥିଲା ।
ଏହି କାର୍ଯ୍ୟକ୍ରମରେ ୧୦୮ ଆମ୍ବୁଲାନ୍ସ କର୍ମଚାରୀ, ଜିଲ୍ଲା ପ୍ରତିନିଧି, ଗ୍ରାମର ନେତା ଓ ସ୍ଥାନୀୟ ବାସିନ୍ଦା ଉତ୍ସାହର ସହ ଅଂଶଗ୍ରହଣ କରିଥିଲେ। ଆଲୋଚନା ଚକ୍ର ମାଧ୍ୟମରେ ମଶାଙ୍କ ପ୍ରଜନନ ନିୟନ୍ତ୍ରଣ ପାଇଁ ମଶାଦାନୀ ବ୍ୟବହାର, ପରିଷ୍କାର ପରିବେଶ ବଜାୟ ରଖିବା ଏବଂ ଜମା ପାଣିକୁ ଦୂର କରିବା ଭଳି ସରଳ ତଥା ପ୍ରଭାବଶାଳୀ ପ୍ରତିଷେଧକ ବ୍ୟବସ୍ଥା ଉପରେ ଟିମ୍ ଗୁରୁତ୍ୱାରୋପ କରିଥିଲେ।
ସଚେତନତା ସୃଷ୍ଟି ପାଇଁ ସୂଚନାଭିତ୍ତିକ ଲିଫ୍ଲେଟ୍ ବଣ୍ଟନ କରାଯାଇଥିଲା। ଏହି ଅଭିଯାନରେ ଜନସାଧାରଣଙ୍କୁ ୧୦୮ ଆମ୍ବୁଲାନ୍ସ ସେବା ବିଷୟରେ ଅବଗତ କରାଇବା ସହ ଯେକୌଣସି ମେଡିକାଲ ଜରୁରୀକାଳୀନ ପରିସ୍ଥିତି ପାଇଁ ୧୦୮ ଡାଏଲ କରି ମାଗଣା ଏବଂ ଠିକ୍ ସମୟରେ ଆମ୍ବୁଲାନ୍ସ ସହାୟତା ପାଇବାକୁ ଅନୁରୋଧ କରାଯାଇଥିଲା । ଗର୍ଭବତୀ ମହିଳାଙ୍କୁ ସ୍ୱାସ୍ଥ୍ୟ ସେବାରେ ପହଞ୍ଚାଇବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଥିବା ଜନନୀ ଆମ୍ବୁଲାନ୍ସ ସେବା ଉପରେ ବିଶେଷ ଗୁରୁତ୍ୱ ଦିଆଯାଇଥିଲା ।
ଏହି ପଦକ୍ଷେପ ଗ୍ରାମୀଣ ସମୁଦାୟରୁ ସକାରାତ୍ମକ ପ୍ରତିକ୍ରିୟା ପାଇଥିଲା ଏବଂ ଜନସ୍ୱାସ୍ଥ୍ୟ ଏବଂ ଜରୁରୀକାଳୀନ ଚିକିତ୍ସା ସହାୟତା ପାଇଁ ୧୦୮ ଆମ୍ବୁଲାନ୍ସ କର୍ମଚାରୀଙ୍କ ପ୍ରତିବଦ୍ଧତା ଉପରେ ଆଲୋକପାତ କରିଥିଲା ।
